കാസർകോട്‌: രാജ്‌ഭവനിലേക്ക്‌ 16ന്‌ നടത്തുന്ന മാർച്ചിന്റെ പ്രചാരണാർഥം കേരള പ്രവാസി സംഘം സംസ്ഥാന കമ്മിറ്റി സംഘടിപ്പിക്കുന്ന പ്രവാസി മുന്നേറ്റ വാഹന ജാഥ തുടങ്ങി. കാസർകോട്‌ പുതിയ ബസ്‌സ്‌റ്റാൻഡ്‌ പരിസരത്ത്‌ മന്ത്രി വി അബ്ദുറഹ്‌മാൻ  ഉദ്‌ഘാടനംചെയ്‌തു. സംഘാടക സമിതി ചെയർമാൻ കെ എ മുഹമ്മദ്‌ ഹനീഫ അധ്യക്ഷനായി. ജാഥാ ക്യാപ്‌റ്റൻ സംസ്ഥാന ജനറൽ സെക്രട്ടറി  കെ വി അബ്ദുൽഖാദർ, വൈസ്‌ ക്യാപ്‌റ്റൻ  സംസ്ഥാന പ്രസിഡന്റ്‌ ഗഫൂർ പി ലില്ലീസ്, സെക്രട്ടറി സെയ്‌താലിക്കുട്ടി, വൈസ്‌ പ്രസിഡന്റ്‌ ഇ എം പി അബൂബക്കർ, എം അനന്തൻ, എ ജി നായർ, ജില്ലാ പ്രസിഡന്റ്‌ ഒ നാരായണൻ, ഹബീബ്‌ തളങ്കര എന്നിവർ സംസാരിച്ചു.  

തിങ്കളാഴ്‌ച കാഞ്ഞങ്ങാട്, തളിപ്പറമ്പ്‌, കണ്ണൂർ, കൂത്തുപറമ്പ്‌ എന്നിവിടങ്ങളിൽ സ്വീകരണം നൽകും. സംസ്ഥാന സർക്കാർ നടപ്പാക്കുന്ന ക്ഷേമ പ്രവർത്തങ്ങൾക്ക് കേന്ദ്ര സഹായം നൽകുക, കേന്ദ്ര സർക്കാർ പിരിച്ചുവിട്ട പ്രവാസി കാര്യ വകുപ്പ് പുനഃസ്ഥാപിക്കുക, സമഗ്രമായ കുടിയേറ്റ നിയമം നടപ്പാക്കുക ആവശ്യങ്ങളുന്നയിച്ചാണ്‌  ജാഥ. സംസ്ഥാന ട്രഷറർ ബാദുഷ കടലുണ്ടി മാനേജരും ആർ ശ്രീകൃഷ്‌ണപിള്ള, പി കെ അബ്ദുല്ല, കെ സി സജീവ്‌ തൈക്കാട്‌, സി കെ കൃഷ്‌ണദാസ്‌, പി ഷാഹിജ, പ്രശാന്ത്‌ കൂട്ടാംപള്ളി എന്നിവർ അംഗങ്ങളുമാണ്‌.  ജാഥ 14ന്‌ തിരുവനന്തപുരത്ത്‌ സമാപിക്കും. സമാപന സമ്മേളനം സിപിഐ എം സംസ്ഥാന സെക്രട്ടറിയറ്റംഗം എം സ്വരാജ് ഉദ്‌ഘാടനംചെയ്യും. 16ന്  രാജ്ഭവൻ മാർച്ച്  സിപിഐ എം സംസ്ഥാന സെക്രട്ടറി എം വി ഗോവിന്ദൻ ഉദ്ഘാടനംചെയ്യും. ഫെബ്രുവരി 15ന് ഡൽഹിയിൽ പാർലമെന്റ്‌ മാർച്ച്‌ നടത്തും.