തിരുവനന്തപുരം: തമിഴ്നാട് സര്‍ക്കാര്‍ പ്രതിനിധികള്‍ നോര്‍ക്ക സെന്റര്‍ സന്ദര്‍ശിച്ചു. ചെന്നൈ നോര്‍ത്തില്‍ നിന്നുളള ലോകസഭാംഗം ഡോ. കലാനിധി വീരസ്വാമിയുടെ നേതൃത്വത്തിലായിരുന്നു സംഘം. തമിഴ്നാട് സര്‍ക്കാര്‍ രൂപീകരിച്ച തമിഴ് പ്രവാസി ക്ഷേമ, പുനരധിവാസ കമ്മീഷണറേറ്റ് കമ്മീഷണര്‍ ശ്രീമതി. ജസിന്ദ ലസൂറസ് ഐ.എ.എസ്, കമ്മീഷണറേറ്റ് പ്രതിനിധികളായ കെ.രമേഷ്, എസ്.അശോക് കുമാര്‍ എന്നിവരും തമിഴ്നാട് സംഘത്തെ പ്രതിനിധീകരിച്ചു. നോര്‍ക്ക സെന്ററിലെത്തിയ സംഘത്തെ സി.ഇ.ഓ ഹരികൃഷ്ണന്‍ നമ്പൂതിരി, ജനറല്‍ മാനേജര്‍ അജിത്ത് കോളശ്ശേരി എന്നിവര്‍ ചേര്‍ന്ന് സ്വീകരിച്ചു. നോര്‍ക്ക വകുപ്പ് പ്രന്‍സിപ്പല്‍ സെക്രട്ടറി സുമന്‍ ബില്ലയുമായും സംഘം കുടിക്കാഴ്ച നടത്തി.
രണ്ടര പതിറ്റാണ്ടോളമായി നോര്‍ക്ക വകുപ്പ് വഴിയും നോര്‍ക്ക റൂട്ട്സ് വഴിയും പ്രവാസികളുമായി ബന്ധപ്പെടുന്നതിന്റെ അനുഭവങ്ങള്‍ തമിഴ്നാട് സംഘവുമായി പങ്കുവച്ചു. സംസ്ഥാന സര്‍ക്കാര്‍ നോര്‍ക്ക റൂട്ട്സ് വഴി നടപ്പിലാക്കിവരുന്ന വിവിധ ക്ഷേമ, പുനരധിവാസ പെന്‍ഷന്‍ പദ്ധതികള്‍, ലോകത്തെ 170 രാജ്യങ്ങളിലായുളള മലയാളി പ്രവാസിയെ കേരളവുമായി ബന്ധിപ്പിക്കുന്ന നോര്‍ക്ക പ്രവാസി ഐ.ഡി കാര്‍ഡ്, കേരളീയ പ്രവാസികളുടെ കൂട്ടായ്മയായ ലോകകേരള സഭ, സര്‍ട്ടിഫിക്കറ്റ് അറ്റസ്റ്റേഷനായുളള വിപുലമായ സംവിധാനങ്ങള്‍, ഗ്ലോബല്‍ കോണ്‍ടാക്ട് സെന്റര്‍ തുടങ്ങിയ കാര്യങ്ങള്‍ ഹരികൃഷ്ണന്‍ നമ്പൂതിരി വിശദീകരിച്ചു. നോര്‍ക്ക റൂട്ട്സിനു സമാനമായി തമിഴ് പ്രവാസികളുടെ ക്ഷേമത്തിനായുളള പദ്ധതികളും സംവിധാനങ്ങളും ഒരുക്കുന്നതിന്റെ മുന്നോടിയായിട്ടാണ് പഠനസംഘം എത്തിയത്.
